*ହିନ୍ଦୁ ସମାଜଠାରୁ ବିଶ୍ୱର ଅପେକ୍ଷା*
ପାଶ୍ଚାତ୍ୟ ଜଗତ ବର୍ଷ ବର୍ଷର ଯାତନା ସହିବା ପରେ ସେଥିରୁ ମୁକ୍ତ ହେବା ପାଇଁ ହିନ୍ଦୁ ଦର୍ଶନ ପ୍ରତି ଆକୃଷ୍ଟ ହେଉଛି। ଏ ସମୟରେ ହିନ୍ଦୁ ସମାଜର ଦାୟିତ୍ୱ ବହୁତ ବଢ଼ି ଯାଇଛି। ହିନ୍ଦୁ ସମାଜ ଥରେ ଚିନ୍ତା କରିବା ଦରକାର ପଶ୍ଚାତ୍ୟ ତାକୁ କେଉଁ ଦୃଷ୍ଟିରେ ଦେଖୁଛି। ବିଶ୍ୱର ବଡ଼ ବଡ଼ ବିଦ୍ୱାନ ଚିନ୍ତାନାୟକ ମାନଙ୍କ ଭାଷାକୁ ହିନ୍ଦୁ ସମାଜ ପଢ଼ିବା ଉଚିତ -
Arnold Joseph Toynbeeଙ୍କ ଭଳି ବ୍ରିଟିଶ ଐତିହାସିକ କହିଛନ୍ତି -
ଏଭଳି ବିଧ୍ଵଂସକାରୀ ବିପଦ ସମୟରୁ ଭୟଙ୍କର ଦୁରବସ୍ଥାରୁ ବଞ୍ଚିବାକୁ ହେଲେ ହିନ୍ଦୁ ଦର୍ଶନକୁ ହିଁ ଆପଣେଇବାକୁ ପଡ଼ିବ। ଏହାଛଡ଼ା ଆଉ କିଛି ରାସ୍ତା ନାହିଁ। ସମସ୍ତ ସମାଜବିତ୍, ଐତିହାସିକ, ବୈଜ୍ଞାନିକ ଭାରତ ଆଡ଼କୁ ଆଶାଭରା ନୟନରେ ଚାହିଁଛନ୍ତି। ଭାରତରୁ ହିଁ କିଛି ମାର୍ଗ ମିଳିବ। ଭାରତରୁ ହିଁ ଆଲୋକ ମିଳିବ। ସେ ପୁଣି କହିଛନ୍ତି - ଭାରତ ଏଥିପାଇଁ ପ୍ରସ୍ତୁତ ଅଛି କି ?
ଭାରତ ଯେବେ ସ୍ୱାଧୀନ ହେଲା ସେତେବେଳେ ବିଶ୍ୱର ବିଶିଷ୍ଟ କଳାକାର Yehudi Menuhin ପଣ୍ଡିତ ନେହେରୁଙ୍କୁ ଯେଉଁ ବାର୍ତ୍ତା ଦେଇଥିଲେ ତାହା ଥିଲା - ଭାରତ ସ୍ୱାଧୀନ ହୋଇଛି। ଆପଣଙ୍କ ଠାରୁ ଆମର ବହୁତ ବଡ଼ ଅପେକ୍ଷା ଅଛି। ଆମେ ତ ଦିଗ୍ ଭ୍ରମିତ ହୋଇ ଅନ୍ଧକାରରେ ଗତିକରୁଛୁ। ଆମକୁ ବାଟ ଦେଖାଇବା ଏବଂ ଅନ୍ଧକାରରୁ ଆଲୋକ ଆଡ଼କୁ ନେଇଯିବାର ଦାୟିତ୍ୱ ଭାରତ ଉପରେ ଆସିଯାଇଛି। କୃପାକରି ଆପଣ ଆମର ଅନ୍ଧାନୁକରଣ କରନ୍ତୁ ନାହିଁ। ଆପଣଙ୍କ ପଛରେ ସମ୍ପୂର୍ଣ୍ଣ ୟୁରୋପ, ସମ୍ପୂର୍ଣ୍ଣ ବିଶ୍ୱ ଚାଲିବା ପାଇଁ ପ୍ରସ୍ତୁତ ହୋଇଯିବ।
ବିଖ୍ୟାତ ଆମେରିକାନ ଦାର୍ଶନିକ Ralph Waldo Emerson କହିଛନ୍ତି -
ଭାରତର ଶ୍ରେଷ୍ଠ ଗ୍ରନ୍ଥମାନଙ୍କରୁ ଯେଉଁ ବିଚାର ଆମକୁ ପଢ଼ିବାକୁ ମିଳୁଛି ସେଥିରେ କିଛି ବି ନ୍ୟୁନତା ଓ ଅଦରକାରୀ ବିଷୟ ନାହିଁ। ଏହି ପୁରାତନ ଜ୍ଞାନର ଉଦାର, ଶାନ୍ତ ଓ ସୁସଙ୍ଗତ ସ୍ୱରରେ ଆମକୁ ଆଘାତ କରୁଥିବା ସମସ୍ତ ପ୍ରଶ୍ନର ଉତ୍ତର ରହିଛି।
ସ୍ୱାମୀ ବିବେକାନନ୍ଦ କହିଛନ୍ତି -
ଅତ୍ୟନ୍ତ ଉଚ୍ଚ ଓ ଉଦ୍ଦାତ୍ତ ବିଚାରକୁ ଜନ୍ମ ଦେଇଆସୁଥିବା ଭାରତ ବିଶ୍ୱକୁ ନିଜର ଆଧ୍ୟାତ୍ମିକ ଦର୍ଶନ ଦ୍ୱାରା ପରିପୋଷିତ କରିଆସିଛି। ଆଜି ମୂର୍ଚ୍ଛାପ୍ରାୟ ହୋଇଯାଉଥିବା, ଭୁଲ୍ ରାସ୍ତାରେ ଚାଲୁଥିବା ମାନବ ଜାତିକୁ ପୁଣି ଥରେ ପ୍ରାଣ ଓ ଚୈତନ୍ୟ ଦେବାର କାମ ଭାରତ ପାଇଁ ଆସିଯାଇଛି।
ଏଥିପାଇଁ ବହୁତ ବଡ଼ ଦାୟିତ୍ୱ ହିନ୍ଦୁ ସମାଜକୁ ବହନ କରିବାକୁ ହେବ। କିନ୍ତୁ ଏ କାମ କ'ଣ ସମ୍ଭବ ହେବ ଯଦି ଆମ କେବଳ କହିଚାଲିବା ଯେ ଆମର ପୂର୍ବଜ ବହୁତ ମହାନ୍ ଥିଲେ। ଏଠାରେ ଆମର ରାମ ରାଜ୍ୟ ଥିଲା। ପୂର୍ବ କାଳରେ ଆମ ସାଧୁ ସନ୍ଥ ତଥା ଚିନ୍ତାନାୟକମାନେ ସାରା ଦୁନିଆ ଗସ୍ତ କରି ଜ୍ଞାନର ଆଲୋକ ଓ ଆମ ସଭ୍ୟତାର ସୌଗନ୍ଧ ପ୍ରସାରିତ କରିଥିଲେ। ଏ କଥା ସବୁ କହିବା ଠିକ୍। କିନ୍ତୁ ସବୁଠୁ ବଡ଼ କଥା ହେଉଛି ସେମାନେ ଆମକୁ ଦେଖିଲେ ପ୍ରଥମେ ପ୍ରଶ୍ନ କରିବେ ଯେ ଆପଣମାନେ ଏବେ କେମିତି ଅଛନ୍ତି ? କେବଳ ଭୂତ ଭବିଷ୍ୟତର ବର୍ଣ୍ଣନ କରିଦେଲେ କାମ ଚଳିବ ନାହିଁ। ବର୍ତ୍ତମାନ ସମୟରେ ଆମର ସ୍ଥିତି ଓ ଆମର କାର୍ଯ୍ୟକଳାପ କିପରି ଅଛି - ଏହି ଚିନ୍ତା ଆମକୁ କରିବାକୁ ହେବ।
No comments:
Post a Comment