ଝିମିଟି ଖେଳରୁ ମହାଭାରତ ପରି ହଠାତ୍ ପାଟେଳି ଗାଁରେ କୁହୁଳି ଉଠିଲା ଦୁଇଟା ମତବାଦ, ନୋକା ନାହାକ ଓ କିଣେଇ ଓଝା କଳିକୁ କେନ୍ଦ୍ରକରି, ଆଉ ତାର ପିଠି ଆଡ଼େ ପର ଘର କଥା, ସିନ୍ଧୁ ଚୌଧୁରୀ ଘର କଥା, ପାଖେ ଯଦି ଦୋଷୀ କହିଲେ, ପାଖେ କହିଲେ ନିଦୋଷୀ। ମନକୁ ମନ ଏପଟ ସେପଟ ହୋଇ ଲୋକେ ଆଉଜିଗଲେ, ସତେ ଯେପରି ଦି' ଭାଗ ହେବାକୁ ଆପଣା ଆପେ ଗାଁର ମନ, ଦରକାର ଥିଲା ଖାଲି ଗୋଟିଏ ଘଟଣାର ପତିଆରା। ଠିକ୍ ଏତିକିବେଳକୁ ମନେ ପଡ଼ିଲା କିଏ କାହା କଥାରୁ କେବେ ବାହାର ହୋଇଥିଲା, କିଏ କାହାକୁ କେବେ ଅପମାନ କରିଥିଲା, ସମାଲୋଚନା କରିଥିଲା, କିଏ କାହାର ଶିରୀ ଦେଖିପାରେ ନାହିଁ, କିଏ କାହାକୁ ଜମି ନ ବିକି ଆଉ କାହାକୁ ବିକିଛି, କିଏ କାଳିରେ ସଉଦା ଦେଇ ନାହିଁ, କିଏ ଉଧାର ଦେଇ ବାଟରେ ଘାଟରେ ମାଗିଛି, କିଏ କାହା ହଳିଆକୁ ଛଡ଼ାଇ ନେଇ ଚାକିରି ରଖିଛି। ଅର୍ଥାତ୍ ଜଣେ ଏ ପାଖେ ରହିଲେ, ଆଉ ଜଣେ ସେପାଖେ ରହିବ। ୟେ ଭୁଲ କହିଲେ, ସେ କହିବ ଠିକ୍। ଆଲୋଚନା କରୁ କରୁ ବହୁଳ ପ୍ରଚାର, ସେଥିରେ ମାଇପଙ୍କ ବିଚାର, ଘରଆଡୁ ନିର୍ଦ୍ଦେଶ ଘେନି ପୁରୁଷଙ୍କ ମତଗଢ଼ା। ହଠାତ୍ ଜଣେ ଆବିଷ୍କାର କରୁଛି, ଆର ଜଣକ କେଡ଼େ ଖରାପ !
ସଞ୍ଜକୁ ଗାଁ ରେ ଦୁଇ ବାଡ଼।
୨୭.୩.୧୯
No comments:
Post a Comment