ଯୁଦ୍ଧ ସରିଯିବା ପରେ ପ୍ରଚଣ୍ଡ ଯୋଦ୍ଧା ଭୀଷ୍ମ ପିତାମହ ଯିଏ ଅଠର ଦିନ ଭିତରୁ ମାତ୍ର ଦଶ ଦିନ ଯୁଦ୍ଧ କରିଥିଲେ, ଯିଏ ଶରଶଯ୍ୟାରେ ପଡ଼ି ରହିଥିଲେ, ତାଙ୍କଠାରୁ ଯୁଧିଷ୍ଠିର ରାଜାଙ୍କ କର୍ତ୍ତବ୍ୟ, ବର୍ଣ୍ଣାଶ୍ରମ ଧର୍ମ, ବିବାହ, ଦାନ ଆଦି ବିଷୟ ଉପରେ ପ୍ରାଚୀନ ଋଷିମାନଙ୍କର ମତ କ'ଣ ଥିଲା ଇତ୍ୟାଦି ଉପଦେଶ ଗ୍ରହଣ କଲେ। ସେ ଯୁଧିଷ୍ଠିରଙ୍କୁ ସାଂଖ୍ୟ ଓ ଯୋଗ ଦର୍ଶନର ଶିକ୍ଷାଦେଲେ। ଅନେକ ଉପାଖ୍ୟାନ ଯଥା ଋଷି, ମୁନି, ରାଜା ତଥା ଦେବତାମାନଙ୍କ ଜୀବନ ପ୍ରସଙ୍ଗ ସବୁ ଶୁଣାଇଲେ। ଏହି ଶିକ୍ଷାରେ ସେହି ଗ୍ରନ୍ଥର ପ୍ରାୟ ଏକ ଚତୁର୍ଥାଂଶ ଭାଗ ପୂର୍ଣ୍ଣ ହୋଇଛି। ଏହା ହିଁ ହିନ୍ଦୁମାନଙ୍କର ନୀତି, ବିଧି ଓ କର୍ତ୍ତବ୍ୟ ଶାସ୍ତ୍ରର ଭଣ୍ଡାର ଅଟେ।
ଏହା ଭିତରେ ଯୁଧିଷ୍ଠିର ରାଜ୍ୟାରୋହଣ କରିଛନ୍ତି। ବ୍ୟାସଦେବଙ୍କ ଆଦେଶ ଅନୁସାରେ ସେ ଅଶ୍ୱମେଧ ଯଜ୍ଞ କରିଛନ୍ତି; କିନ୍ତୁ ଭୀଷଣ ରକ୍ତପାତ, ଗୁରୁଜନ ଏବଂ ଆତ୍ମୀୟ ସ୍ୱଜନଙ୍କୁ ହରାଇଥିବାର ମହାନ ଦୁଃଖ ତାଙ୍କୁ ବ୍ୟଥିତ କରିଛି। ଏହା ତାଙ୍କ ମନକୁ ଉଦବେଳିତ କରିଛି। ଯୁଦ୍ଧ ପରେ ମହାରାଜ ଧୃତରାଷ୍ଟ୍ର ଚଉଦ ବର୍ଷ ପର୍ଯ୍ୟନ୍ତ ଶାନ୍ତି ଓ ସମ୍ମାନପୂର୍ବକ ଜୀବିତ ରହିଛନ୍ତି। ଯୁଧିଷ୍ଠିର ଆଦି ସମସ୍ତେ ତାଙ୍କୁ ପିତାର ସମ୍ମାନ ଦେଇଛନ୍ତି। ଏବେ ସେ ଯୁଧିଷ୍ଠିରଙ୍କୁ ସିଂହାସନ ଛାଡ଼ି ନିଜର ପତି ପରାୟଣା ରାଣୀ ଓ ପାଣ୍ଡବ ଜନନୀ କୁନ୍ତୀଙ୍କ ସହ ନିଜର ଶେଷ ଜୀବନ ଭଗବତ ଆରାଧନାରେ କାଟାଇବା ପାଇଁ ଅରଣ୍ୟକୁ ଚାଲିଯାଇଛନ୍ତି।
କ୍ରମଶଃ...
୨୫.୨.୧୮
No comments:
Post a Comment