ଆଧୁନିକ ବିଜ୍ଞାନ ଆଧାରରେ ସ୍ୱର୍ଗ-ନର୍କର ବିଚାର କରାଯାଇପାରେ। ଗତ ଶତାବ୍ଦୀରୁ ଆକାଶ ଗଙ୍ଗା ବିଷୟରେ ଗବେଷଣା କଲାବେଳେ ବୈଜ୍ଞାନିକ ମାନଙ୍କୁ ଯେଉଁ ପାର୍ଥକ୍ୟ ଜଣା ପଡ଼ିଛି ତାହା ଆଲୋକ ବର୍ଷର ମାପକ ଅଟେ। ଆମର ଆକାଶ ଗଙ୍ଗା ହଜାର ହଜାର ଆଲୋକବର୍ଷର ବିସ୍ତାରିତ ରୂପ ଅଟେ।
ସେହି ଅନ୍ତରକୁ ଦେଖିଲେ ଗରୁଡ଼ ପୁରାଣର ଦୁର୍ଗନ୍ଧ ନଦୀ ବା ବାଇବେଲର ରୂପରେଖ ବା କୁରାନର ସ୍ୱର୍ଗ-ନର୍କର ଵର୍ଣ୍ଣନ ତା ତୁଳନାରେ ନଗଣ୍ୟ ଅଟେ। ଏ ପର୍ଯ୍ୟନ୍ତ ମନୁଷ୍ୟକୁ ଆକାଶରେ କୌଣସି ଅଲଗା ପ୍ରକାରର ମାନବୀ ବା ଅମାନବୀ ଅସ୍ତିତ୍ୱର ସନ୍ଧାନ ମିଳିନାହିଁ। ସେଠାକାର ଜୀବନ ସ୍ୱର୍ଗ ବା ନର୍କ କେଉଁ ପ୍ରକାର ହେବ ସେ ବିଷୟରେ ନିଶ୍ଚିତ କିଛି କହି ହେବ ନାହିଁ। ପାର୍ସୀ ଧର୍ମଗ୍ରନ୍ଥ ବୁନ୍ଦାହିସ ୧୨-୭ ରେ ସଂସାର ମଧ୍ୟରୁ ନର୍କର ଦ୍ୱାର ପର୍ଯ୍ୟନ୍ତ ଯିବାପାଇଁ ଚିନୱତ ପୋଲର ବିଚାର କରାଯାଇଛି। ପରନ୍ତୁ ସେପରି ପୋଲର ସନ୍ଧାନ ଆକାଶ ବିଜ୍ଞାନୀମାନେ ଏ ଯାଏ କରିପାରି ନାହାନ୍ତି।
ସ୍ୱର୍ଗ-ନର୍କର ବିଚାର ପ୍ରତ୍ୟେକ ମତର ପ୍ରବର୍ତ୍ତକମାନେ
ଲୋକମାନେ ସତ୍ ପଥରେ ଚାଲିବାପାଇଁ, ସ୍ୱର୍ଗ ସୁଖ ଲାଭ କରିବାପାଇଁ, ନର୍କ ଯାତନାରୁ ଦୂରରେ ରହିବାପାଇଁ କରିଛନ୍ତି। ଭଲ କାମର ପରିଭାଷା ଆଜି ବଦଳିଗଲା ପରି ଲାଗୁଛି। ନୂଆ ଶାସନ ପ୍ରଣାଳୀ, ନୂଆ ନିୟମ, ନୂଆ ସମ୍ବଳ ନିର୍ମାଣ ହେବା କାରଣରୁ ମନୁଷ୍ୟର ଦୈନନ୍ଦିନ ବ୍ୟବହାର ବହୁ ମାତ୍ରାରେ ବଦଳିଥିବା ସତ୍ତ୍ୱେ ମାନବତା, ମନୁଷ୍ୟ-ମନୁଷ୍ୟ ମଧ୍ୟରେ ହାର୍ଦିକ ସମ୍ବନ୍ଧ, ପରସ୍ପର ପ୍ରେମ, ବିଶ୍ୱାସ ଏବଂ ବର୍ତ୍ତମାନ ପରିପ୍ରେକ୍ଷୀରେ ସହିଷ୍ଣୁତା ବଜାୟ ରଖିବାର ଉଦ୍ୟମ - ଏହା ଅନ୍ତତଃ ପୃଥିବୀରେ ସ୍ୱର୍ଗର ଅବତରଣ କରିପାରିବ।
୨୯. ୧୧. ୧୭
No comments:
Post a Comment