*କାଳ ଉପରେ ବିଜୟ*

     ଭିକ୍ଷୁକଟିଏ ଧର୍ମରାଜ ଯୁଧିଷ୍ଠିରଙ୍କ ନିକଟକୁ ଭିକ୍ଷା ପ୍ରାପ୍ତି ଉଦ୍ଦେଶ୍ୟରେ ଗଲା । ଯୁଧିଷ୍ଠିର କୌଣସି ଭିନ୍ନ ଏକ କାର୍ଯ୍ୟରେ ମଗ୍ନ ଥିଲେ । ବ୍ୟସ୍ତତା ହେତୁ ଭିକ୍ଷୁକକୁ କହିଲେ -
   " କାଲି ଆସ, ତୁମକୁ ଭିକ୍ଷା ମିଳିବ ।"

     ଏହା ଶୁଣି ଭୀମ ଧୀରେ ଉଠିପଡ଼ି ନାଚି ନାଚି ବିଜୟର ବାଦ୍ୟ ବଜାଇବା ଆରମ୍ଭ କରି ଦେଲେ । ନାଗରା ବାଜିବା ଦେଖି ଧର୍ମରାଜ ବିସ୍ମିତ ହୋଇ ତା'ର କାରଣ ଜିଜ୍ଞାସା କଲେ। ଭୀମ ଉତ୍ତର ଦେଲେ -

"ହେ ଅଗ୍ରଜ, ଅଦ୍ୟାବଧି କେହି କାଳ ଉପରେ ବିଜୟ ଲାଭ କରି ନାହିଁ । କିନ୍ତୁ, ଆପଣ ଏହି କୁଟିଳ କାଳ ଉପରେ ଅନ୍ତତଃ କାଲି ଯାଏ ବିଜୟ ପାଇ ଯାଇଛନ୍ତି । ସେହି ବିଜୟ ଉଲ୍ଲାସରେ ମୁଁ ବିଜୟ ବାଦ୍ୟ ବଜାଇ ଦେଲି ।"

   "କିପରି ?" ଧର୍ମରାଜ ଜାଣିବାକୁ ଚାହିଁଲେ ।

     "ଏଇ, ଆପଣ ଘୋଷଣା କଲେ ଯେ ଭିକ୍ଷୁକକୁ ଆସନ୍ତାକାଲି ଭିକ୍ଷା ଦିଆଯିବ । ତେବେ କାଲି ପର୍ଯ୍ୟନ୍ତ ଭିକ୍ଷୁକ ବଞ୍ଚି ରହିବ ବୋଲି ଆପଣଙ୍କର ପୂର୍ଣ୍ଣ ବିଶ୍ୱାସ ଥିବାରୁ ସିନା ଆପଣ ଏ କଥା
କହିପାରିଲେ । ଅନ୍ୟଥା ଜଣେ କ୍ଷଣସ୍ଥାୟୀ ମାନବ ଏ କଥା କିପରି କହିପାରିବ ?"

    ଭୀମଙ୍କ ଏତାଦୃଶ ବକ୍ରୋକ୍ତି ଶୁଣି ଧର୍ମରାଜ ଲଜ୍ଜିତ ହେଲେ । କାଳର ଦର୍ଶନ ଏପରି ଯେ, ଆସନ୍ତାକାଲି କ'ଣ ଘଟିବ ତାହା କାହାରିକୁ ଜଣା ନାହିଁ । ମାତ୍ର, ଯୁଧିଷ୍ଠିର ବ୍ୟସ୍ତତା ମଧ୍ୟରେ ଏହି ଦର୍ଶନର ବିପରୀତ କଥା କହିପକାଇଥିଲେ ।

      ଭୀମଙ୍କ କଥା ଶୁଣି ତାଙ୍କର ଜ୍ଞାନୋଦୟ ହେଲା ।

୭.୭.୧୭